A catedrática Camiño Noia (Nigrán), gaña ex aequo o 11º Premio de Tradución Plácido Castro.

-O galardón recae sobre a tradución ao galego feita por Camiño Noia da novela de Alain-Fournier, O gran Meaulnes (Le Grand Meaulnes).
– O premio destaca a calidade das traducións dos clásicos da literatura universal que a Biblioteca Virtual BIVIR publica periodicamente na súa páxina web.
A catedrática en lingua e literatura galega, Camiño Noia Campos (veciña de Nigrán e membro do Instituto de Estudos Miñoranos) foi galardoada ex aequo pola súa tradución da novela O gran Meaulnes (Alain-Fournier,1913)co 11º Premio de Tradución Plácido Castro, outorgado pola fundación do mesmo nome.
O gran Meaulnes (Le Grand Meaulnes), é a única novela escrita por Alain-Fournier (Francia, 1883-1914), finado aos 27 anos durante a I Guerra Mundial, e atopado nunha fosa común alemá en 1991. O libro, escrito en 1913 está considerada unha das mellores obras da literatura francesa dos últimos séculos e conta con traducións en varios idiomas.
A primeira versión da tradución ao galego de Camiño Noia, viu a luz no ano 1988, nunha edición da editorial Xerais. Na actualidade, o libro ten unha versión dixital (de descarga libre) na Biblioteca Virtual de Literatura Universal en Galego (Bivir), administrada pola Asociación de tradutores Galegos, catálogo sobre o que recae o premio.
O xurado, integrado por representantes da propia Fundación Plácido Castro, a Xunta de Galicia, o IGADI, a Real Academia Galega e a Asociación de Tradutores Galegos, fundamentou a galardón no “excelente manexo da lingua que consegue reproducir á perfección as distintas atmosferas nas que se desenvolve o argumento”. E salienta que a mesma ofrece ” unha perfecta reconstrución en galego do heroe romántico que se lanza á persecución dos seus soños”.
Os outros premiados son os tradutores Lourenzo Maroño e Elena Sherevera, pola Antoloxía da poesía rusa: de Pushkin a Evtushenko, segundo o veredicto dado a coñecer o pasado venres 23 de novembro en Vilagarcía de Arousa.
Os premiados nesta edición recibirán o diploma acreditativo e unha escultura alegórica da autoría de Xaquín Chaves o próximo día 1 de decembro ás 12 horas no Concello de Vilagarcía de Arousa.