As vítimas do franquismo foron homenaxeadas na Eira da Xoana

O IEM, representado polo seu director Carlos Méixome, estivo presente na Eira da Xoana, situada na parroquia de Ramil (Agolada), onde se rendeu unha homenaxe o pasado sábado 18 de agosto de2012 ás vítimas da represión franquista. No acto – organizado por ADEGA e a Asociación cultural O Galo de Santiago de Compostela- inaugurouse un monólito coa inscrición “A quen loitou pola xustiza e a liberdade. As casas e o monte foron o seu acubillo”.
A cerimonia de homenaxe comezou en Sá (Pas de Rei), o sitio onde apareceron os corpos sen vida de Sixto Aguirre e Camilo Díaz Valiño.
A seguinte zona que visitaron os asistentes á concentración foi Toques (A Coruña). Alí homenaxeamos a Ramón Rodríguez Varela, coñecido como O Curuxás, quen sobreviviu nos montes do Careóm até o ano 1967; Marcial Villamor Varela e Delfino Liñeira Fraga, popularmente chamado polo nome de Ferroviario.
Ao mediodía, a Eira da Xoana reuniu aos participantes do acto para celebrar unha comida de confraternidade. Xa pola tarde, no propio lugar agoladense, inaugurouse un monólito en honra aos “fuxidos”, contando coa presenza de Mini e Mero, un dúo de cantautores chairegos.