Comezou a segunda fase de escavacións no xacemento de O Cabrón

{youtube width=”200″ height=”160″}SWNb_kl2DlM{/youtube}

Onte pola maña, o ruído das pas e picos batendo contra a terra anunciou o inicio da segunda fase dos traballos arqueolóxicos nas viñas de O Cabrón, no municipio de Arbo.  O obxectivo da xornada era avanzar na primeira terraza escavada e no segundo rectángulo da sondaxe ata aproximarse aos estratos onde se atoparon as primeiras pezas.

Con todo, a terra meiga sempre agocha sorpresas e poucos centímetros despois de tirar  a capa superficial de terra, un grande conxunto de industrias comezou a debuxarse na terraza principal do xacemento. Cunha diferenza apreciable con relación ao primeiro tramo escavado a liña arqueolóxica situouse moi por enriba do agardado. Por outra banda, no rectángulo da segunda  sondaxe, situada a menos dun metro da principal, non se atopou ningunha peza.

Hoxe continúan os traballos de escavación e recollida de pezas arqueolóxicas coa certeza de que novos achados permitirán afondar na interpretación do xacemento.