César Morán no Auditorio Lois Tobío.

{youtube width=”250″ height=”200″}IMNvsJF-g2U{/youtube}

A homenaxe no Centenario de Álvaro Cunqueiro organizada polo IEM, contou coa participación de César Morán (Toural dos Vaos, O Bierzo, 1954), músico e catedrático de Lingua e Literatura galega. Durante a súa actuación no Auditorio Lois Tobío, Morán interpretou unha escolma de poemas, por el  musicalizados, do escritor de Mondoñedo, que forman parte do seu último traballo editado por Ouvirmos: Fotobiografía Sonora de Álvaro Cunqueiro, así como temas do seu próximo disco Haberá Primavera. Na ocasión, estivo acompañado no contrabaixo, polo seu irmán Alfonso Morán, membro da Real Filharmonía de Galicia.

Durante a súa traxectoria, Morán combinou as tarefas musicais e literarias como intérprete e compositor, expresións que fixo extensivas ao mundo do teatro, da televisión e do cinema. Como autor literario ten publicado poemas e relatos en xornais, revistas e volumes colectivos (Luzes de Galiza, Nós, Fogo cruzado, Rumbo ás illas), e máis intensa foi a súa actividade crítica e filolóxica, participando en encontros e congresos dentro e fóra do país. Coautor da Nova gramática para a aprendizaxe da lingua (1988), colaborou en diversos volumes de autoría colectiva e en publicacións periódicas como A Nosa Terra, Diario 16 de Galicia, Agália, Luzes de Galiza, La Voz de Galicia ou Estudos Portugueses e Africanos.
Dedicoulle especial atención á obra de Álvaro Cunqueiro, de quen realizou a última entrevista pouco antes da súa morte, sendo tamén autor da primeira tese de licenciatura sobre o escritor mindoniense nunha universidade galega. O seu estudo O mundo narrativo de Álvaro Cunqueiro (1990) é fonte de moitos traballos posteriores, propios e alleos.
Como antecedente da súa produción musical atópase a colaboración poético-musical con Manuel Rivas no CD O pobo da noite (1996) é o disco Río de son e vento.