Remata o curso de formación de especialistas en Toponimia.

O curso desenvolveuse ao longo do mes de marzo en Vigo e Pontevedra e remata en Gondomar. As sesións finais desenvolveranse o venres 23, pola tarde, e o sábado, 24, na Aula de Cultura Ponte de Rosas, sede do Instituto de Estudos Miñoranos, entidade organizadora do curso xunto aos concellos de Vigo, Pontevedra e Ourense e coa colaboración da Vicerreitoría de Extensión Cultural e a Área de Normalización Lingüística da Universidade de Vigo.

Con cento dez persoas matriculadas, o curso desenvolveu as súas sesións en Vigo (os días 2, 3, 9, e 10 de marzo) e en Pontevedra (23 e 24 de marzo) co obxectivo de:

• Formar especialistas na recollida de toponimia
• Achegarse á metodoloxía e ás ferramentas básicas para a recollida de campo
• Aproximarse aos problemas específicos da recollida
• Coñecer experiencias de recollida e aplicacións prácticas
• Realizar prácticas de campo en distintos concellos

Este venres e sábado desenvolveranse as últimas sesións do mesmo. A xornada do venres conta con tres relatorios a cargo de Luís Bará (concelleiro de Patrimonio de Pontevedra), Marta Souto (técnica de Normalización do concello de Vigo) e Luz Méndez (da Asociación Galega de Onomástica). A sesión do sábado polo mañá comezará co relatorio de Xavier Gomila, especialista en toponimia en Menorca, a profesora Pilar Barreiro que falará dos seus traballos co alumnado de Ensino Primario no colexio de Camos e Xulia Marqués, lingüista e da Asociación Galega de Onomástica.

Ao remate dos relatorios serán entregados os diplomas acreditativos polo alcalde de Gondomar, Fernando Guitián, o vicerreitor de Extensión Cultural, Henrique Costas, o director do IEM, Carlos Méixome e o director do curso Gonzalo Navaza.

Tras o xantar de confraternidade realizarase unha visita guiada por Monteferro a fin de coñecer a Talasonimia deste lugar. A visita estará guiada polo arqueólogo, subdirector do IEM e coordinador deste curso Xosé Lois Vilar.

Diversos concellos, entre eles o de Gondomar así como a Área de Normalización da Universidade de Vigo xa comprometeron  a chega de varias bolsas de traballo para poder realizar prácticas de recollida de toponimia en diversos lugares.

Presentación do I Curso de Formación de Especialistas en Toponimia

{youtube}D_ZTOYuX-uo{/youtube}