Xornada divulgativa “A riqueza do patrimonio marítimo” no Centro Cultural de Priegue.

O patrimonio marítimo e fluvial como recurso económico e de traballo; a historia da construción e uso das gamelas guardesas e coruxeiras ; os nomes do mar e as historias de naufraxios na costa miñorana, son algúns dos temas que formarán parte da Xornada divulgativa “A riqueza do patrimonio marítimo” a desenvolverse o vindeiro venres 16 de setembro no Centro Cultural O Torreiro de Priegue.
A xornada comezará ás 9:30 hora cunha presentación e benvida a cargo do alcalde de Nigrán, Alberto Valverde, e membros da Xunta Directiva e equipo técnico do Grupo de Acción Costeira (GAC7). Inmediatamente despois, o relator Tiago Pérez González da Asociación Mar de Pedra de Amigos das Gamelas, falará das gamelas guardesas e coruxeiras. Seguidamente Xosé Lois Vilar (IEM)fará unha presentación dos nomes do mar (talasonimia), onde afondará na experiencia da recollida deste patrimonio inmaterial e presentará casos da costa sur galega.
O coloquio continuará cunha intervención de Víctor Fernández Bouzas, da Federación Galega pola Cultura Marítimo e Fluvial, na que poñerá sobre a mesa os recursos marítimos e fluviais como valor económico a traballar. “Para que queremos o Patrimonio?”, será o tema desenvolvido por Lino Lema Bouzas, da Consellería do Mar.
Logo dunha comida para todos os participantes, terá lugar unha ruta guiada por Monteferro, a cargo de Xosé Lois Vilar onde traballarase in situ sobre os nomes do mar, naufraxios, toponimia e o valor arqueolóxico e patrimonial da costa do sur.
A asistencia está aberta a tódolos interesados, previa inscrición no teléfono 646 873 106 e no correo electrónico gacvigoaguarda@yahoo.es.
Prema aquí para ver o programa.