Libros do Val Miñor para obsequiar neste Nadal.

retallos de GONDOMAR DE MIÑOR, o libro onde os veciños do concello de Gondomar presentan a súa terra a través de fotografías e textos é un dos títulos que o IEM ofrece para agasallar ou agasallarse nestas festas.

A publicación, ademais de 60 testemuños fotográficos e escritos, contén unha investigación sobre a orixe do nome Gondomar do especialista Gonzalo Navaza, un artigo sobre a paisaxe humana e xeográfica do mestre Miguel Anxo Mouriño e apuntes do patrimonio material e histórico do concello feito polo arquitecto Antonio Soliño Troncoso.

O libro pode adquirirse na Aula de Cultura Ponte de Rosas (Avda. da Feira, 10 baixo, Gondomar)  de luns a venres de 18 a 22 horas a un prezo de 20€. Tamén se pode reservar  exemplares a través do correo  oficina@minhor.org  ou no teléfono 986 360 575 no mesmo horario.

Máis títulos

Lembranza da tecedeira, de Victoriano Taibo. O libro fascímile escrito da súa man, asinado e datado en Morgadáns en 1947 vai acompañado dun pequeno estudo composto de tres artigos; o primeiro, de Antonio Valverde, sobra a historia do manuscrito; o segundo, de Marta Dacosta, ofrece unha visión lírica e simbólica do poema; o terceiro, de Miguel Anxo Mouriño, analiza o léxico utilizado. Leva, ademais, un cd que contén o poema recitado por Anxo Angueira co fondo musical que, para esta edición, compuxo Antón Seoane. Prezo 10€.

Territorio estraños, de Ramón Sandoval. Cunha edición limitada o poemario de Ramón Sandoval,  gañador do VI Premio de Poesía Victoriano Taibo – ELM de Morgadáns foi destacado polo xurado pola súa “enerxía e plasticidade do verso, a solidez na construción do poema, os acertos expresivos e o contido lirismo”. Prezo 10€.

Revista de Estudos Miñoranos Nº 10/11 . O anuario recolle as últimas pescudas feitas polo IEM e colaboradores sobre distintos aspectos da vida económica, social e cultural do Val Miñor. O traballo contén un dossier con cinco artigos sobre o parque empresarial de Porto do Molle; artigos sobre cartografía, toponimia e naufraxios nas costas da bisbarra; apuntamentos sobre Frei Martín Sarmiento no Val Miñor; reflexións sobre o estado do patrimonio arqueolóxico; dous artigos que afondan no labor de dúas institucións vencelladas á comarca (Igadi e Espazo Lectura), e diversas achegas literarias e culturais. Prezo 12€.