A poeta Marta Dacosta gaña o XVI Premio de Poesía Johán Carballeira outorgado polo Concello de Bueu.

O Día das Letras Galegas trouxo máis dunha alegría polas terras do Miñor. Entre a marea de actos e festexos que alumeaban todos os recunchos do val recibíamos a boa nova de que a querida compañeira, a poeta Marta Dacosta recibía o primeiro premio da XVI Edición do Premio de Poesía Johán Carballeira, outorgado polo Concello de Bueu.

Marta acadou o premio coa obra titulada “dun lago escuro“, traballo que o xurado destacou polo “elaborado xogo simbólico do poemario, alicerzado nunha arquitectura esférica onde o lacunar de ameaza escura recolle un discurso fondamente parabólico, con evidentes tinturas de crítica social que van de mans dadas coas luzadas de afirmación xenérica e as reflexións a propósito de trabes temáticas como a incerteza, a caída, a soidade, o silencio, a anonimia ou a rutina esgazadora”.

“dun lago escuro” competiu  con outros corenta orixinais presentados a concurso, entre os que se contaban “moi diversas propostas tanto no temático coma no estilístico”, segundo informa no seu blog Armando Requeixo, membro do xurado xunto con Berta Dávila e Xosé Daniel Costas. A autora fíxose acredora dun premio  dotado de 1500 euros e a publicación do poemario gañador, que verá luz da man de Edicións Xerais de Galicia.

O IEM fai chegar os seus parabéns á prezada compañeira polo premio acadado así como pola súa labor permanente e comprometida no enriquecemento das letras do país.