Gondomar acolle a presentación do libro “Un percorrido pola historia do Val Miñor”.

-A obra recolle a lembranza da comarca do Val Miñor a través dun percorrido pola súa historia

A Aula de Cultura Ponte de Rosas acolleu na tarde do venres a presentación do libro Un percorrido pola historia do Val Miñor de Carmen Pérez Pérez.

O alcalde de Gondomar foi o encargado de abrir o acto cunha intervención na que salientou diversas instancias de colaboración que se están a desenvolver entre o Concello,  o Instituto de Estudos Miñoranos, a Deputación de Pontevedra e a propia Carmen, vínculo que fixo posible que este libro vise a luz.

Pola súa parte, o arquitecto Antonio Soliño Troncoso (IEM) resaltou a escaseza deste tipo de publicacións agradecendo á autora a elaboración deste libro que “chega para cubrir un oco importante”.

Froito dunha intensa labor de investigación que comezou no arquivo histórico de Morgadáns e logo de consultar un gran número de escrituras públicas, Carmen Pérez Pérez, veciña da parroquia de Chaín (e nada en Morgadáns), recolle a lembranza do que foi o Val Miñor nesta obra editada pola Deputación de Pontevedra. “A Deputación ten a labor de sacar á luz estes documentos que demostran que nas terras do Val Miñor hai moito interese” afirmou Rafael Louzán, presidente da Deputación de Pontevedra.

Segundo a propia autora a obra xurdiu “case sen querelo”. O camiño deste percorrido polo Val Miñor arranca do desexo de Carmen de compoñer a árbore xenealóxica da súa familia e case sen sabelo acabou inmersa neste proxecto.

Ao longo das 116 páxinas que compoñen esta obra, a autora ofrece ao lector un achegamento á historia da comarca a través de imaxes e descricións de lugares tan emblemáticos como a Casa do Lago de Morgadáns, o Pazo de Mendoza (Gondomar), a Torre do Reloxo (Baiona) ou o Pazo de Suero (Nigrán).

Un percorrido pola historia do Val Miñor convértese, deste xeito nunha obra importante que achegará aos veciños o seu propio pasado e permitirá aos visitantes coñecer a beleza e historia do Val Miñor.

O acto tivo lugar ás 20.00 horas e nel estiveron presentes o alcalde de Gondomar, Fernando Guitián, o membro do Instituto de Estudos Miñoranos, Antonio Soliño Troncoso, o presidente da Deputación de Pontevedra, Rafael Louzán, e Alberto Valverde e Xesús Vázquez, alcaldes de Nigrán e Baiona entre outros.