O IEM estará presente no Mercado de Arte este domingo en Sabarís.

O próximo domingo 29 de maio celébrase unha nova edición do Mercado de Arte de Sabarís na Praza de Abastos da localidade baionesa. Por un día a praza mercado trocará en mercado de arte no que se amosarán e poderán mercarse obras de múltiples artistas miñoranos. O evento vai das 10 ás 21 horas e está organizado pola Asociación de Comerciantes e Empresarios de Sabrís (COEMSA).
A cita atópase como unha ocasión ineludible para todas aquelas persoas da bisbarra ou da área metropolitana de Vigo que sexan amantes da arte. Os organizadores esperar superar a achega de expositores e visitantes do ano pasado. A mostra tamén permitirá contactar en persoa aos artistas. Dende a organización salientan a diversidade de obras e as amplas posibilidades económicas para adquirir unha obra de arte que ofrece este mercado.
A mostra contará con obras de artistas de recoñecida traxectoria, achegas de afeccionados, centros de formación da zona en múltiples disciplinas e do Instituto de Estudos Miñoranos.