“O futuro do Galiñeiro” será obxecto dunha mesa – coloquio organizada polo Club Faro de Vigo.

Os proxectos para habilitar a explotación de Terras raras e a instalación dun parque eólico na Serra do Galiñeiro centrarán a mesa redonda “O futuro do Galiñeiro” que organiza o Club Faro de Vigo este vindeiro mércores 19 de decembro no Auditorio do Areal de Vigo (Areal, 46). O coloquio que dará comezo ás 8 da tarde, contará coa presenza do director do IEM, Carlos Méixome; o presidente da Real Academia Galega Xosé Luís Méndez Ferrín; o ex director de Conservación da Natureza, Xosé Benito Reza e Antón García, secretario da Plataforma pola protección da Serra do Galiñeiro. No mesmo acto terá lugar a presentación do libro Nós Galiñeiro, de Méndez Ferrín, recentemente editado polo IEM en colaboración coa Plataforma.
O “Futuro da Serra do Galiñeiro” será unha excelente ocasión para coñecer de primeira man as características de ambos os dous proxectos, así como a súa terrible pegada sobre o patrimonio natural e cultural da serra. Patrimonio senlleiro do que da conta xustamente Nós Galiñeiro, un libro que acolle unha magnífica escolma de artigos xornalísticos do escritor Méndez Ferrín.
Tamén poderá coñecerse a situación na que se atopa o proxecto que pretende engadir O Galiñeiro ao espazo protexido do Monte Aloia (do que forma parte de xeito natural), que fora dirixido por Xosé Benito Reza. Carlos Méixome abordará diversas pescudas que co respecto ao patrimonio que agocha o enclave ten feitas o Instituto de Estudos Miñoranos. Finalmente, Antón García dará conta das diversas accións desenvolvidas dende a plataforma ca fin de evitar a concreción dos proxectos de minería a ceo aberto e a instalación de aeroxeradores, nas cumes do Monte.