Recordatorio comunal a Luís García Crego

O sábado 29, ás 12,00 horas, terá lugar na Taberna A´de Lino, na Fraga, en Moaña, un acto comunal en lembranza de Luís García Crego, falecido na noite do 24 de xuño.
Amigas, amigos, familia reunirémonos arredor da memoria de Luís, un home afable, íntegro, sempre disposto, desde os seus tempos de estudante (con Manolo Reinoso, Celso L. Pazos e outros) no Instituto vigués do Calvario, en pleno franquismo, ao apoio e á solidariedade cos desfavorecidos; un home xeneroso. Entre os seus mellores amigos de sempre, aqueles traballadores da loita de Ascón (Lois, Toñito, Chéchare, Pancho, Xulio Abollo, Xulio Torres…) cos que tantas horas gozosas de conversas e de leria pasou no barrio de Teis.
Natural de Vigo e con raíces no Ribeiro do Avia por vía materna, viviu nos últimos anos na parroquia de Meira, no Morrazo, onde levantou casa en compañía da súa compañeira Maite Herrero.
Traballou na delegación da ONCE, en Vigo, contribuíndo decisivamente á súa galeguización.
Excelente fotógrafo (das loitas populares na praia de Baldaio até as escolas María Soliña na India), viaxeiro e amante das pequenas cousas, Luís García Crego caracterizouse por un profundo sentido da amizade e por un espírito partidario da máis ampla unidade e entendemento entre as xentes do común.
Os seus irmáns Emilio e Xosé, veciños miñoranos e colaboradores do IEM lamentan dar noticia do triste pasamento.