Exposición de María Moreira. Trinta anos de moda galega

DO 15 DE ABRIL AO 14 DE MAIO
Comisariado: Rosalía Pazo Maside, Colaboracións: Andrea Moreira, Jesús Valmaseda e Escola de Moda da Universidade de Vigo
HORARIO Luns a venres de 19 a 21 h.
AULA DE CULTURA PONTE DE ROSAS Avda. da Feira, 10 Gondomar

A exposición María Moreira. Trinta anos de moda galega, tenta amosar unha síntese da traxectoria profesional dunha das figuras máis destacadas do deseño de moda realizado desde Galiza. A mostra está estruturada en torno a tres liñas argumentais:

Un percorrido visual polas diferentes etapas que atravesa o traballo da deseñadora, afectado pola propia evolución profesional, pero tamén polos condicionamentos que sufre e modifican o mundo da moda. 

Os comezos: a iniciativa dunha  moza decidida, traballadora incansable, que emerxe sen formación especializada ao deseño e consegue instalarse de seu nun ámbito de dominio masculino.

Os oitenta: o momento estelar da moda galega; a década por excelencia de proxección pública da moda española e dos seus protagonistas, coa complicidade institucional e a receptividade dun público seducido pola estética do efémero, polo “glamour” do consumo. É a época do triunfo da imaxe sobre as ideoloxías, do gusto polo inmediato e o hedonismo sobre as ideas e actitudes transcendentes. Nun clima de dinamismo cultural, que en Vigo e Madrid adopta o nome de “movida” como marca local, a moda estreita os lazos coas diferentes artes nun obxectivo común presente no ambiente do momento: a popularización da “alta cultura”. María Moreira combina sen reparos cores e xeometrías  nos seus audaces deseños de punto tricot e desenvolve a liña téxtil “Convencional” de roupa sofisticada para vestir polas rúas.

Como último tramo, os anos subseguintes: anos nos que a globalización do mercado e a imposición das grandes producións comerciais transforma a industria da moda, deixando para o deseño de calidade unha marxe de acción constrinxida e difícil. Substituíndo ao ambiguo e controvertido termo “posmodernidade”, os efectos do capitalismo mundial sobre as sociedades atopan definición certeira no máis descritivo “globalización”, que ao igual que designa a desaparición de fronteiras comunicativas, comporta concentración de poder nas multinacionais e perda de capacidade de captación de consumidores para aqueles produtos non amparados polas grandes marcas e os baixos custes de produción. Así, desde mediados dos anos noventa, o proxecto de M.M. vese sacudido por unha dura e continua loita por facer compatible a calidade do deseño achegado pola súa experiencia coa permanencia da pequena empresa que dirixe.

2. Explicación do proceso de deseño que precede ás fases de produción e comercialización. Bosquexos, patróns, mostras de tecidos, fornituras, debuxos de motivos decorativos, fotografías  das prendas xa montadas –realizadas como documentación para o arquivo da empresa-, carpetas de promoción, etc., ofrecen ao público unha aproximación á complexa actividade que se desenvolve nun taller de deseño.

3. Un apartado de contido documental que, a modo de sección de “sociedade”, a través de fotografías, entrevistas, artigos e reportaxes de prensa e televisión, dan conta da proxección pública que acompañou os diferentes momentos da carreira profesional da deseñadora e reflicten o tratamento que recibe o deseño de moda nos medios de comunicación.

Os inconvenientes que supoñen para unha exposición retrospectiva as limitacións de espazo quedan salvados pola utilización de imaxes de arquivo en soporte audiovisual, ampliando de xeito significativo a información sobre os máis de 30 anos de traballo desta deseñadora, oriúnda de Vilaza, Gondomar, lugar no que hoxe reside e traballa.