xeiras 2012

O vindeiro mércores 1 de agosto terá lugar unha Xeira do Instituto de Estudos Miñoranos pola fraga de Oliveira. O percorrido estará guiado por Xosé Ramón García (IEM), con quen visitarase unhas paraxes que están dacabalo dos concellos de Gondomar e Baiona, polas beiras do río da Groba, entre os lugares de A Granxa e Belesar en Baiona, e Abrullido e Oliveira en Gondomar. Deste último recibe o nome. O punto de encontro será no Mercado de Sabarís ás 18 horas.

-Este venres día 20 de xullo ás 22:00horas celebrarase unha visita aos petróglifos do Monte Tetón.
– A Xeira estará guiada polo arqueólogo Xosé Lois Vilar (IEM)

Unha das novidades que traen as Xeiras do IEM neste 2012 é a realización de espectáculos no marco das visitas. O primeiro terá lugar este mércores 18 de xullo  pola noite onde gozaremos dun concerto de arpa e voz da artista viguesa Marta Quintana. O mesmo terá lugar ao pé dos petróglifos de Outeiro dos Lameiros. Preme aquí para descargar o folleto da Xeira.
Marta Quintana.

-Xeira do IEM polos petróglifos de Outeiro dos Lameiros e recital de arpa de Marta Quintana.
Unha visita nocturna á Estación de Arte Rupestre do Outeiro dos Lameiros será o próximo obxectivo dunha nova Xeira do Instituto de Estudos Miñoranos. A mesma terá lugar o vindeiro mércores 18 de xullo, e o punto de encontro será a carón do cemiterio de Sabarís ás 22 horas, dende onde se partirá en caravana de coches cara o xacemento. A noite terá unha convidada especial: a arpista Marta Quintana a que brindará un concerto ao pé dos petróglifos.

O vindeiro mércores 11 de xullo terá lugar unha nova Xeira do Instituto de Estudos Miñoranos co nome: “Roteiro polos Montes de Couso”. Unha ruta peonil coa que a Comunidade de Montes de Couso en colaboración co IEM puxo en valor boa parte do seu legado etnográfico e do seu patrimonio histórico e natural. Nove muíños de auga, algúns deles con máis de dous séculos de antigüidade, cruceiros, pontes e petos de ánimas sucédense ao longo do carreiro circular, que parte e culmina na casa veciñal da parroquia.

-Volven as Xeiras do IEM por onceavo ano consecutivo.
O Instituto de Estudos Miñoranos ten programadas sete saídas no Val Miñor e catro aos petróglifos do Monte Tetón no calendario correspondente ás Xeiras do verán 2012. Como é tradicional, trátase dunha serie de visitas-guiadas a distintos lugares de especial interese histórico, artístico, natural e paisaxístico do Val de Miñor e a súa contorna, con pequenos percorridos a realizar polas tardes ou ao anoitecer dirixidos por especialistas no tema da visita.

Por onceavo ano consecutivo terán lugar durante o verán as tradicionais Xeiras do IEM, unha serie de visitas-guiadas a distintos lugares de especial interese histórico, artístico, natural e paisaxístico do Val de Miñor e a súa contorna. Trátase de pequenos percorridos a realizar polas tardes ou ao anoitecer dirixidos por especialistas no tema da visita.
Como dende hai algún tempo haberá dous bloques de xeiras. As propias do IEM, dentro dos tres concellos miñorás, e outro de visitas ao Monte Tetón, organizadas xunto co Concello de Tomiño, a primeira delas xa foi o pasado venres.