1.1 dramatica

I Certame escolar de creación dramática -IEM

1.2 dramatica

Desde a Sección de Teatro do Instituto de Estudos Miñoráns (IEM) vimos realizando nestes anos unha mostra de teatro afeccionado do Val de Miñor. Agora, co curso académico que comeza neste mes de setembro, queremos pór en marcha outro devezo: a creación dun certame de escrita dramática para o estudantado, desde 5º de Primaria, até rematar a educación secundaria, cunha idade máxima de 20 anos.

Por que crear un certame de escrita dramática dirixido á mocidade?
O teatro debería ser unha materia formativa máis. A través del non só aprendemos a interpretar, representar, crear espazos, desenvolver emocións, senón que tamén aprendemos a relacionarnos co público. Vocalizar, proxectar a voz, colocarse ante un auditorio, controlar a linguaxe corporal, empatizar ou perder o medo escénico, son ferramentas da vida diaria que calquera persoa debería coñecer e que o teatro nos dá.
O teatro é tamén unha forma de achegarse á literatura, á música ou á plástica, mesmo outra forma de se achegar á tecnoloxía e á informática. É unha disciplina e é unha técnica. É un medio de ampliar os nosos coñecementos.
A literatura dramática é a irmá desfavorecida dos xéneros literarios, por iso consideramos que crear un certame de textos dramáticos é un incentivo para achegarnos á expresión escrita e á creación literaria, ao tempo que nos dotamos do pretexto perfecto para a representación: contarmos cun texto de noso, acaído á idade do alumnado que o pode representar.

Neste primeiro proxecto temos previsto que a representación das obras premiadas sexa unha tarefa encomendada aos grupos de teatro afeccionado que forman parte da Sección de Teatro do IEM, deixando para os participantes o importantísimo reto de proporcionar as obras necesarias, reto que o seu profesorado pode aproveitar para fomentar e desenvolver as capacidades e destrezas do alumnado (creatividade, expresión e representación escrita, expresión plástica, etc.)

Estamos ilusionados e ilusionadas con esta proposta e agardamos que a acollades coa mesma emoción e a convición de que é unha ferramenta pedagóxica tradicional e modernísima que redundará exitosamente na formación do alumnado.
Animádevos a participar!!!
author avatar
IEM

Tamén che pode interesar

iemministerio
As Causas Militares do Val Miñor 1936 – 1939
7 Setembro, 2018
captura de pantalla 2018-06-23 a las 23.57.17
O IEM acolle a presentación da obra Entre guerra e pub de La sombra del oso. Mércores 4 de xullo ás 21:00h.
23 Xuño, 2018
cartaz iem toponimia
Presentación da toponimia de Vilaza. Sábado 16 ás 18:30 h.
11 Xuño, 2018

Deixar unha resposta

O teu enderezo electrónico non se publicará Os campos obrigatorios están marcados con *