Comezan as Xeiras do IEM no Val Miñor cunha visita aos pazos da Torre d’A Touza e Cea en Nigrán.

-Volven as Xeiras do IEM por onceavo ano consecutivo.
O Instituto de Estudos Miñoranos ten programadas sete saídas no Val Miñor e catro aos petróglifos do Monte Tetón no calendario correspondente ás Xeiras do verán 2012. Como é tradicional, trátase dunha serie de visitas-guiadas a distintos lugares de especial interese histórico, artístico, natural e paisaxístico do Val de Miñor e a súa contorna, con pequenos percorridos a realizar polas tardes ou ao anoitecer dirixidos por especialistas no tema da visita.
Como dende hai algún tempo haberá dous bloques de xeiras. As propias do IEM, dentro dos tres concellos miñorás, e outro de visitas ao Monte Tetón, organizadas xunto co Concello de Tomiño, a primeira delas xa foi o pasado venres.
A primeira das saídas no Val Miñor terá lugar este mércores 4 de xullo e visitarase dous senlleiros Pazos de Nigrán, os de Cea e a Torre d´A Touza, ambos actualmente reconvertidos á actividade hostaleira. A visita será guiada polo arquitecto e membro da Xunta de Goberno do IEM Antonio Soliño Troncoso.
O punto de encontro será no Torreiro d´As Angustias ás 18 horas, onde se pode deixar os coches con tranquilidade. Despois irase a pé ata Cea. Logo recolleranse os automóbiles para ir cara ao Pazo d´A Touza.