Xeiras do IEM, Alén Miñor: 3ª Xeira, Terras do Medio (Agolada)

Ben entrado este caloroso outono, na que os verdores transmútanse, os poucos, no pardo propio da temporada, o Instituto de Estudos Miñoranos convida a todo aquel que queira gozar dunha xornada de coñecemento e recoñecemento da cultura do País, a unha nova xeira que nos levará polas Terras fronteirizas de Pontevedra e Lugo.

Compre madrugar (7.45 da mañá na explanada do Pavillón dos deportes de Gondomar, coma noutras ocasións) pois a luz do sol vai ser cativa.

A escolma dos lugares non é doada, esperamos atinar e que sexa do agrado da maioría.

Visitaremos a espectacular e fermosa igrexa de Santa María de Ventosa (sc.XIII), nomeadamente por moitos a “ Catedral rural de Galicia”. O interior acolle unha marabillosa colección de escultura medieval, verdadeiramente sorprendente.

As escenas bíblicas saen das paredes mentres, por atrás, observamos fermosos frescos tamén do XVI.

Tamén apreciaremos a faciana de  dous “green mens” ou homes verdes, propios do imaxinario de diferentes culturas medievais europeas.

Mellor non saber máis deste enigmático lugar e a súa contorna, aprecialo cos nosos sentidos será unha experiencia dificilmente esquecida.

Terra inzada de arte rupestre coma no Val Miñor, eliximos o petróglifo de Aspra na parroquia de Asiaz como mostra. Puñais e Alabaras destacan sobre os demais motivos, sendo un dos máis recoñecidos da Bisbarra do Deza.

Disfrutaremos tamén de dous elementos arquitectónicos referenciados coa revolta dos Irmandiños, coma A Torre de Borraxeiros e de Amarante, erguidas aínda tras encaixar revoltas, reconstrucións e o paso do tempo e do clima pouco compracente.

Teremos tempo de camiña por espazos ben fermosos cheos de natureza primitiva coma o Sobreiral de Arnego, ata ben pouco único bosque de sobreiras no que se explota a cortiza, e o río do mesmo nome, un privilexio en calquera época do ano.

Co lusco fusco percorreremos no centro da vila os Pendellos, referencia das feiras, onde “os convivios eran vida nas datas que o mundo labrego recoñecía con cariño nas distancias: …estas casetiñas humildes de granito eran a ledicia dos espellos en cadaquén de noso, no día feliz dos convivios de feira e trato, de palabras e namoros, de tempo esperanzado. E o polbo  -aquí sempre dixemos pulpo- nun espazo  de caldeiras e de achas, de pan branco e viño tinto; de cafeses e augardente; de palabra dada; de ledicia e de namoros” Xosé Vázquez Pintor. (Xornalista, poeta) , o noso guía.

CARACTERISTICAS DA VIAXE

DATA: 13 Decembro, Domingo

 HORARIO APROXIMADO:

SAIDA: 7:45 saída en Autocar dende Gondomar

XANTAR: 14.00 horas 

CHEGADA: 21.30-10:00 A Gondomar, mesmo lugar de partida

 PREZOS:

35 euros socios do IEM,

40 euros non socios

 O prezo inclúe viaxe, seguro,  tódalas visitas e comida.

 PRAZAS: 55. 

As reservas farémolas por rigorosa orde de chegada. As mesmas deben facerse no teléfono 986 360 575 de luns a venres de 18 a 22 horas ou no correo electrónico oficina@ minhor.org .